Luís Seoane López

 

 

 

Luís Seoane

Dedicóuselle o Día das Letras Galegas en 1994

Nacido en Bos Aires no ano 1910, fillo de emigrantes, veu de neno a Galicia. Fixo o bacharelato na Coruña e Dereito en Santiago de Compostela, onde participou na actividade política e cultural estudiantil. Sendo aínda estudante universitario demostrou a súa vocacion artística ilustrando libros e publicando debuxos en revistas e xornais.
De 1931 a 1936 exerceu de avogado laboralista na Coruña e foi membro do Partido Galeguista. Tras a sublevación do 18 de xullo de 1936 mantívose agachado durante uns meses ata que en 1937 puido exiliarse a Bos Aires vía Lisboa. Alí fixou a súa residencia e traballou no consulado republicano.
Foi o promotor de moitas empresas culturais, da emigración e do interior (revistas como Galicia Libre, Galicia Emigrante ou Cuco-Rei, a imprenta Resol en Santiago de Compostela xunto a Arturo Cuadrado; editoriais como a Losada; o Laboratorio de Formas de Galicia, xunto a Isaac Díaz Pardo, do que nacerá o complexo de Sargadelos, etc.). Non deixou nunca de afrontar proxectos e participar activamente na recuperación da cultura galega.
Regresou a España en 1960. Nas últimas décadas da súa vida, alternou a residencia en América con viaxes a Galicia. Morreu na Coruña en 1979.
[editar]Obra pictórica

A súa obra como artista gráfico foi importantísima: debuxante, gravador, deseñador de libros e de obxectos cerámicos, cartelista, pintor... Luís Seoane é un dos máis grandes plásticos galegos de tódolos tempos, e sen dúbida o máis completo e coñecido. A súa obra é tan extensa como o foron as súas inquedanzas artísticas e intelectuais. A súa obra pictórica reflicta ese amor a Galicia e a súa ansia por recuperar paisaxes, símbolos e personaxes galegos para facelos universais. A súa obra, de tendencia expresionista e cercana á abstración, foi exposta en lugares como Bos Aires, Montevideo, Londres, Nova York, Venecia, México, Bruxelas, Hamburgo...


Obra literaria

Publicou numerosos estudos e ensaios de arte, obras de teatro, crónicas radiofónicas, etc.
Como poeta publicou Fardel de exilado (1952), Na brétema, Santiago (1956), As cicatrices (1959), A maior abondamento (1972). No 1977 Edicións do Castro publicou a súa obra poética completa.

Obra en galego

Poesía

Fardel d'eisilado (Bos Aires, Ediciós Anxel Casal, 1952)
Na brétema, Sant-Yago (Bos Aires, Ediciones Botella al Mar, 1956)
As cicatrices (Bos Aires, Editorial Citania, 1959)

Narración

Tres follas de ruda e un allo verde (inédito). Publicado en tradución castelá: Tres hojas de ruda y un ajo verde (Bos Aires, Ediciones Botella al Mar, 1948)

Teatro

A soldadeira (inédita). Publicada en tradución castelá: La soldadera (Bos Aires, Editorial Ariadna, 1957)

Ensaio

Eiroa (Vigo, Galaxia, 1957)
Castelao artista (Bos Aires, Alborada, 1969)
Grabados e dibuxos con textos literarios
Homaxe a un paxaro (A Coruña, Ediciós do Castro, 1969)
Retratos de esguello (A Coruña, Ediciós do Castro, 1968)
O meco (A Coruña, Ediciós do Castro, 1963)
O conde asesino de Sobrado (A Coruña-Bos Aires, Ediciós Cuco-Rei, 1971)
Comunicacións mesturadas (Vigo, Galaxia, 1973)

Obra en castelán

13 Estampas de la traición, Bos Aires, edición de autor, (1937)
Homenaje a la Torre de Hércules, (1945)

Fonte: Na Galipedia, a wikipedia en galego

 

 

Artigos relacionados: Luís Seoane na nosa sección "Plástica"

 

 

 

 

 

 

www.galespa.com.ar